Arborea. Torrat sa Sagra de sa Pulenta 

Torrat ocannu puru, ricu che a semper, s’apuntamentu cun sa Sagra de sa Pulenta de Arborea, lòmpida a sa de 41 editziones. Duas dies de mustras e mercados de s’artesania, mùsica, ispetàculos e ispàssiu pro mannos e piticos, sàbadu 19 e domìnigu 20 de santugaine, acumpangiadas dae tastaduras de sa reina de sa festa, sa pulenta, fata cun farra de trigu de Ìndias a chilòmetru zeru.

Si cumentzat sàbadu, a is 18.30, cun su cuntzertu de is coros Lago Rosso de Tuenno e Santa Cecìlia de Arborea. A is 20.00 at a sighire su cuntzertu de sa Fanfara de is Bersallieris A. Fattini de Bèrgamu e sa tastadura de sa pulenta, coghinada dae sa Pro Loco in bator maneras diferentes, acumpangiada dae sa Festa de sa birra e de s’atzidòrgia, contivigiada dae is giòvanos de sa Pro Loco. Domìnigu 20, a is 9.00, su Comunu de Villorba presentat su longumetràgiu Caras de Villa Dolcetta, in su Teatru de is Salesianos.

A is 10.00 ant a abèrrere su Mercadu de s’artesania, cussu de is durches sardos e cussu de Campànnia Amiga de Coldiretti. A is 11.00 àtera sonada de Fanfara de is Bersallieris A. Fattini de Bèrgamu fintzas a lòmpi a is 12.30 cun sa tastadura de màndigos diferentes cuncordados cun sa pulenta. A pustis pràngiu, ancoras mùsica e ispetàculos fintzas a meritzeddu.

Su faeddu chi inditat sa farra de su trigu de Ìndias arribat dae su latinu polĕnta(m), chi boliat nàrrere farra de òrgiu aturradu, forsis ligadu cun puls, polta, e pollen, isceti. Is voluntàrios coghineris de sa Pro Loco nde faghent màndigos licantzosos, chi onni annu faghent arribare a Arborea unu frùmene de gente.

Dae unos bìndighi annos interessamus fintzas a is dischentes de s’iscola de sa pipiesa e de s’iscola primària de Arborea e, giai dae ocannu passadu, fintzas a cussos de Marrùbiu, narat Pàulu Sanneris, presidente de sa Pro Loco de sa bidda de sa Bonìfica. Un’ocasione pro faeddare de sa nàschida, de s’ìstòria e de sa cultura de Arborea, cumentzende dae is mandiares de su connotu de is vènetos, emilianos e friulanos chi, paris cun is sardos, aiant abbiatzadu custa parte bonificada de su Campidanu de Terraba.  

Faina fatta cun s'agiudu de sa Regione Sardigna Avisu IMPRENTAS - L.R. 22/2018, art. 22

A cura di Antoni Nàtziu Garau

E' sempre tempo per abbonarsi a L'ARBORENSE

Approfitta delle nostre promozioni.

CLICCA QUI per sapere come fare

Tweet